Switzerland (NogobNews) 14/07/2016

Dad gaaraya todoba ruux ayaa ku dhaawacmay weerar lala beegsaday Tareen ay saarnaayeen oo marayey waqooyi-bari dalka Switzerland.

 

Weerarkan ayaa waxaa la sheegay inuu geystay nin heysta dhalashada dalkaasi balse aan weli la shaacin magaciisa, waxaana la sheegay in ninkan uu isku dayey inuu dab qabadsiiyo qeyb kamid ah tareenka kadibna wuxuu mindi ku weeraray lix qof oo tareenka la saarnaa oo ay dhaawacyo soo gaareen, qof 7aad ayaa la sheegay inuu dhaawacmay kadib markii uu isku dayey inuu ninkaasi qabto.

Dadka dhaawacmay ayaa la sheegay inuu ku jiro cunug yar oo da’adiisa lagu sheegay 6 sano jir.

Tareenkan ayaa marayey xiliga weerarkan dhacay meel u dhaxeysa magaalooyinka Sennwald iyo Buchs ee waqooyiga wadankaasi.

Booliiska ayaa sheegay inaysan fileyn in weerarkan uu wax xiriir ah la leeyahay fal argagaxiso, balse shacabka ayaa si weyn uga argagaxay weerarkan maadaama weeraro noocaan ah ay horey uga dhaceen dalka ay jaarka yihiin ee Germany.