Turkiga (NogobNews) 26/07/2016

Waxaa maanta oo Jimce ah weerar bambaano oo xoogleh lagu qaaday xarunta Taliska Booliiska ee magaalada Cizre oo ku taal Koonfur bari wadanka Turkiga.

 

Weerarkan ayaa la sheegayaa inay ku dhinteen ugu yaraan 9 askari oo ka tirsan ciidamada amaanka dowlada Turkiga, waxaana loo adeegsaday qaraxa gaari lasoo saaray bambaano. Qarax labaad ayaa la sheegayaa inuu ka dhacay nawaaxiga xarunta kaydka ee militariga ee isla magaaladaasi Cizre.

Magaalada Cizre oo u dhaw xaduuda wadanka Turkiga la wadaago dalalka Ciraaq iyo Siiriya ayaa waxaa ku badan Qawmiyada Kurdida, waxaana horey magaaladaasi bilihii lasoo dhaafay uga dhacay iska horimaadyo u dhaxeeya taageerayaasha kooxda PKK iyo ciidamada amaanka Turkiga.

Qaraxan ayaa lala beegsaday ciidamada Turkiga xili dowlada Turkiga ay ciidamadeeda u dirtay gudaha wadanka Siiriya, waxaana lagu soo waramayaa in ciidamada Turkiga ee hada gudaha ugalay Siiriya ay sidoo kale la dagaalameen xoogaga Kurdida Siiriya ee loo yaqaa YPG oo ku sugnaa goobaha ku dhaw magaalada Jarablus oo ay shalay ciidamada Turkiga xoog uga saareen kooxda Daacish.

Turkiga ayaa Arbacadii ku dhawaaqay inuu bilaabayo olole ka dhan ah kooxaha Daacish iyo kuwa Kurdida oo ay uga sifeenayaan xaduuda uu wadankaasi la wadaago dalka Siiriya.