Flordia (NogobNews) 02/09/2016

 

Gantaal ay leedahay shirkadda Duulimaadka Hawada Sare ee SpaceX oo loo yaqaan Falcon 9 rocket ayaa ku burburay qarax ka dhacay goobtii laga gani lahaa, shilkan oo khasaare weyn ku keenay shirkada Facebook oo uu gantaalkan u siday satellite.

Shirkad Isra’iil laga leeyahay ayuu sidoo kale gantaalkan u siday satellite nooca isgaarsiinta ah.

Shirkadda Facebook ayaa iyaduna dooneysay in satellite-keeda u isticmaasho mashruuc ay ku tilmaamtay fududeynta isgaarsiinta internetka ee Qaarada Afrika. Shilkan ayaa ka dhacay xarunta shirkada SpaceX ku leedahay deegaanka Cape Canaveral ee gobalka Flordia.

Maaha shilkii ugu horeeyey oo uu ku burburo gantaal ay leedahay shirkada sida gaarka ah loo leeyahay ee SpaceX, waxaana bishii June ee sanadkii hore sidan oo kale hawada ugu qarxay gantaal sahay u siday xarunta Caalamiga ah ee hawada sare ku taal ee ISS.