Kenya (NogobNews) -8/09/2016

Beeraleyda iyo dad ka ganacsada Qaadka dalka Kenya ayaa bilaabay banaanbaxyo ay uga soo horjeedaan joojinta qaadka iyagoo eedeyn u jeediyey Guddoomiyaha gobalka Meru.

Ganacsatada ayaa sheegay in joojinta qaadka uu khatar ku yahay noloshooda iyo dakhligii soo geli jiray, isla markaana doonayaan in dowlada Kenya wax ka qabato arrintan iyo sidoo looga dhaadhicin lahaa Soomaaliya inay dib u furto ganacsiga qaadka.

Waxay ganacsatadan sidoo kale cambaareyn kala dul dhaceen Guddoomiyaha Gobalka Meru Peter Munya oo dhawaan booqasho ku tagay Somaliland, arrintaasi oo la sheegay inay ka careysiisay dowlada Soomaaliya oo soo rogtay xanibaada Qaadka, waxayna ganacsatadan kenyaanka ah sheegeen in guddoomiyaha Meru ku khaldanaa booqashadii Somaliland.

Safiirka Soomaaliya u fadhiya Kenya Ambassador Jamaal Xasan ayaa shalay saxaafada u xaqiijiyey in sababta loo joojiyey Qaadka ay la xariirto xubnihii Kenyaanka ahaa ee tagay Somaliland iyo jawaabtii dowlada Soomaaliya ay arrintan ka bixisay.

Guddoomiye Peter Munya oo iska difaacaya eedeyntan ayaa sheegay in joojinta qaadka aysan la xariirin booqashadii uu ku tagay Somaliland, balse la xariirto dhanka amaanka oo ay dowlada Soomaaliya dooneyso inay amniga sugto xiliga shirka IGAD uu ka dhacayo magaalada Muqdisho, sidaana loo joojiyey si Kumeel gaar ah Qaadka.

Guddoomiye Munya ayaa sheegay in dacaayada laga faafiyey isaga shaqsiyan ay tahay mid lagu bahdilayo, isla markaana naftiisa khatar lagu gelinayo. Munya ayaa sheegay in naftiisu khatar ku jirto oo uu ka cabsanayo in ay dilaan beeraleyda Miirowga iyo ganacsatada Qaadku, wuxuu sheegey in Guddoomiyihii isaga ka horeeyey Ntai wa Nkuraru la diley sabatuna ay ahayd arrimo la xiriira Qaadka Miirowga.