Garoowe (NogobNews) 08/09/2016

Wareegto ka soo baxdey xafiiska Madaxweyne ku-xigeenka Puntland Cabdixakiin Cabdullaahi Cumar maanta oo Khamiis ah ayaa lagu sheegay in gawaarida rakaabka ah la marinaayo baaritaan adag.

Puntland ayaa amartey in la baaro dhamaan dadka rakaabka ah ee waddooyinka ku safraaya. Waxaa lagu amrey laamaha amnigu in ay diiwaan geliyaan wadayaasha gawaarida, taarikada gaariga meesha uu ka yimid iyo halka uu u socdo.

Madaxweyne kuxigeenka Puntland ayaa wareegtadiisa ku sheegay in si adag loo baaro gawaarida iyada oo la ilaalinayo sharafta muwaadiniinta, gawaaridaasi ha ahaato mid ku jeeda Koonfurta Soomaaliya ama gudaha Puntland.

Qorshaha cusub ee Puntland soo rogtey ayaa ah in wadayaasha gawaaridu ay tagaan Saldhigga magaalada ay rakaabka ka qaadayaan, marka ay dhamaystaan rakaabka si loo siiyo caddeynta rakaabkiisa, arrintan oo ah mid aan marka Puntland laga sameyn ayaa la is weydiin karaa culeyska ay keeni karto, marka la eego tiro badnida safarada gudaha Puntland ka dhaca, haddii la siku dayo in qorshahan la fuliyo.

Tan iyo weerarkii Gaalkacyo ka dhacay 21 Agoosto ayaa Puntland soo saartey amaro kala duwan oo ay sheegtey in lagua dkeynaayo amniga, waxaana kamid ah in gawaarida ganacsiga ka keena Koonfurta Soomaaliya ay ku wareejinayaan Gaalkacyo, taas oo sababtey in gawaari badan weli ku xaniban tahay Gaalkacyo, waxaana go’aankan ku soo beegmey xili gawaarida qaarkood ay sideen xoolihii Udxiyada la dhoofin jirey ama la qalan jirey.