Kenya (NogobNews) 28/10/2016

Ciidamada Amaanka ee Kenya ayaa Khamiistii shalay toogasho ku dilay nin la sheegay inuu sitay Mindi, isla markaana weerar ku qaaday ciidamo illaalo ka hayey Safaarada Maraykanka ee ku taal xaafada Girigiri ee magaalada Nairobi.

Mid kamid ah Askarta Kenya ee goobtaasi illaalinayey ayaa la sheegay inuu dhaawac kasoo gaaray mindida uu kusoo weeraray ninkaasi oo lagu sheegay inuu ahaa Soomaalida Kenya, sida ay sheegeen saraakiisha Kenyaanka. Weerarka ayaa ka dhacay qeybta albaabka Safaarada ay ka galaan dadka weydiisanaya Fiisooyinka.

Ciidamada Maraykanka iyo kuwa danbi baarista Maraykanka ee FBI ayaa isla markiiba baaritaan ku bilaabay weerarkaasi iyadoo aan weli wax faah faahin ah laga soo saarin baaritaanka socda.

Waxaa maanta oo Jimce ah la sheegay inay xiran tahay gebi ahaanba Safaarada Maraykanka ee Nairobi.

Weerarkan ayey Booliiska Kenya ku eedeenayaan Al Shabaab, walow kooxdaasi aysan weli sheegan.

Al Shabaab ayaa maalmihii lasoo dhaafay weeraro ka geysatay qeybo kamid ah dhulka Waqooyi Bari Kenya ee saaran xaduuda u dhaxeysa Soomaaliya iyo Kenya, waxaana bandow lagu soo rogay magaalada Mandheera oo ay ka dhaceen weeraro ay kooxdaasi geysatay.