Turkiga (estvlive) 16/04/207

Ka dib markii maanta ay dalka turkiga ay ka dhacday afti dadweyne oo dastuurka wadankaasi wax lagaga bedelayo, ayaa goordhowayd waxaa la  soo xiray dhammaan goobaha codbixinta ee goboladda.

 

iyadoo weli ay socoto tirinta codadka la dhiibtay ayaa natiijiada hordhac ee soo baxaysaa waxay sheegaysaa in ay ku horreeyaan xisbiga madaxweyne Erdogan oo %52 codadkii la tiriyay ay u codeeyeen HAA, halka dadka MAYA ku codeeyeen ay ilaa iyo hadda heleen  %47.

Ilaa 55 milyan oo qof  ayaa xaq u leh inay codeeyaan aftida dastuurka, iyadoo dadka u soo baxay codbixinta aftidana  lagu qiyaasay %85 boqolkiiba.

Inkastoo ay ku horreeyeen  inta badan gobolada dalka qolooyinka horkacaya isbedelka dastuurka, ayaa haddana gobolka Diyarbakir ee  ay u badan yihiin qowmiyada kurdida, boqolkiiba 33 waxay u codeeyeen in loo kordhiyo awooda madaxweyne Erdegon, iyadoo dadka ka soo horjeeda  ay gaarayaan %67 (Boqolkiiba 67). Sidoo kale Magaaladda ugu weyn dalkaasi ee Istanbul ayaa natiijooyinka aan rasmiga ahayn waxay tilmaamayaan inay ka soo horjeesteen isbedelka dastuurka (Haa:%49, Maya %50)

Wakaaladda Wararka Anadolu ayaa baahisay natiijo aan rasmi ahayn ee codbixiyayaasha 4 milyan oo turkida ku nool dalka Jarmalka, kuwasoo  %63 u codeeyay in isbedel lagu sameeyo dastuurka.

Gabagabadii, Haddii uu ku guulaysto Madaxweynaha Turkigu aftidan oo laga guurayo nidaamkii barlamaanka, oo awooda loo wareejinayo madaxweynaha, wuxuu awood u yeelan doono inuu soo dhiso gollaha wasiiradda, kala diri karo barlamaanka, ku dhawaaqi karo Xaalad deg deg ah, waxaa kaloo uu isbedelkan uu u ogolaanaya madaxweynaha in xilka sii hayn karo ilaa 2029ka.

Horseed Media 2017