Bosaaso (estvlive) 30/04/2017

Ciidamadda Ilaaladda Dekeda Bosaso ayaa shalay gacanta ku dhigay Hub Fudud iyo Rasaas lagu soo dhexqariyay raashin iyo Baakado timir ah, kuwasoo la doonayay in si qarsoodi looga saaro Dekeda Bosaso sida uu horseedmedia u sheegay sarkaal ka tirsan Ciidamadda Turbataariyadda.

Hubka la qabtay ayaa isugu jiray in ka badan 16 Bastooladood iyo Rasaas tiro badan oo la sheegayo inay siday dooni ka timid dalka yemen, waxayna ciidamadu xireen nin ganacsade ah oo  hubka sitay, inkastoo aan weli ciidamadu soo bandhigin magaca ninka la xiray.

 

” hubkan waxaa lagu soo qariyay Daasado caano-booro ah, baakado timid iyo kiishash timir ah, waxayna isugu jiraan Bastooladaha loo yaqaan Biljamka iyo nooca Dhabanacasta ah, waxaa loo waday hab ganacsi: ayuu yiri Sarkaal ka tirsanaa ciidamada Ilaaladda Dekeda oo magaciis qariyay.

Taliska Ciidamadda booliiska gobolka bari ayaan weli ka hadlin hubka la qabtay, tiradiisa iyo wax laga yeelayo, hase yeeshee ma ah markii u horraysay ee Dekeda Bosaso lagu qabto hub fudud oo si sharci darro ah la doonayay in lagu soo galiyo Bosaso.

Gabagabadii, Tan iyo markii uu qarxay dagaalka dalka Yemen  waxaa degaamadda Puntland ku soo qulqulayay hub fudud kaasi oo si kotorobaan ah lagaga soo dejiyo xeebaha Puntland,  iyadoo hubkaasi marar badan loo adeegsaday in lagu fuliyo dilal qorshaysan oo lagu khaarajiyay saraakiil sare oo ka tirsan Puntland iyo dad kale oo shacab.