Muqdisho (estvlive) 16/06/2017

Madaxweynaha dowladda Federaalka  Soomaaliya  Maxamed Cabdullaahi Maxamed Farmaajo ayaa maanta salaadda Jimcaha kula tukaday boqolaal shacab ah Masjidka Isbaheysiga Islaamka, isagoo salaada kadibna khudbad u jeediyay shacabka, kana dalbaday inay la shaqeeyaan

Madaxweynuhu wuxuu ka hadlay  weerarkii dadka badani ku dhinteen ee lagu qaaday makhaayadda Pizza house ee Magaaladda Muqdisho, waxaana uu Madaxweynaha uu xusay in taasi looga hortagi karo in si wada jir ah la isaga kaashado howlgalka ka dhanka ah Al-Shabaab.

 

wuxuu tilmaamay in ciidamada ku shaqada leh xasilinta amniga caasimadda aysan kaligood waxba qaban karin, haddii aysan helin taageerada Shacabka, kana codsaday inay xoojiyaan la shaqeynta laamaha amniga.

“Sidaad ogtihiin doraad dad masaakiin ah oo meel ka qaxweynaya oo waqti Ramadaan ku jira, ayaa dad sheeganaya dad magac diin ku socday, waxa ay laayeen wax Allaale wixii carruur ah ee meesha joogay oo goob ku afurayay, kuwaasi oo isugu jiray carruur, gabdho iyo dad da’ah, maxay galabsadeen, dadkaasi waxaa lagu laayay magac Muslim., Diintee qabta in la laayo dad maato ah oo naf la xalaaleysto” ayuu yiri Madaxweyne Farmaajo, wuxuuna sii raaciyay

“Waxaan rabnaa inaad dowladiina gacan siiyaan oo aad ka hortagtaan qofkasta oo ku soo dhexdhuumanaya ee doonaya inay bulshadooda dhibaateeyaan, waxaan rabnaa in qofka Soomaaliga uu aamino in uu dhulkan uu isagu leeyahay, oo aan difaacano dhulkeena, Badaheena iyo Cirka intuba” ayuu  Madaxweynuhu hadalkiisa ku daray.

Madaxweynaha ayaa hoosta ka xariiqay in dowladdu ay xoogga saareyso sidii shacabkeeda ay ugu adeegi lahayd si daacadnimo ah, balse shacabka looga baahanyahay inay door ka qaataan xaqiijinta amniga oo ay ciidamada la shaqeeyaan, maadaama ay habeen iyo maalin u taaganyihiin difaaca Qaranimadooda.

“Ciidan shisheeye dalkiina ma xoreynayaan ee idinka ayaa la idinka rabaa inaad dalkiina cadowga ka xoreysaan, dadka na caawinaya ee aad arkeysaan Awooweyaashaad ayaad u soo shaqeeyay, marka anagu aan ka shaqeysanayo sidii dadka naga dambeeya aan magac wanaagsan ugu sameyn lahayn. ayuu Madaxweyne Farmaajo khudbadiisa ku soo gabo gabeeyay.