Muqdisho (estvlive) 07/07/2017

Xalane Dugsiga Tababarka Ciidamada Soomaaliya. Maanta waxay saldhig u tahay ajaanibta Soomaaliya u soo shaqoo tagtey, waa xarunta ugu weyn ee ay degan yihiin ciidanka AMISOM, hay’adaha Qaramada Midoobey Safaarado shisheeye. Waxaa ku yaala gudaha Xalane Hoteelo, si weyn loo ilaaliyo, goobo ganacsi, goobo laga cunteeyo waxaana ka shaqeeya in ka badan 150 Shirkadood oo u badan ajaanib.

Waxaa maalintii Khamiista booqdey Wasiiro ka socda xukuumadda Federaalka, waxaana kamid ahaa Wasiirka Maaliyadda Cabdiraxmaan Beyle, Wasiiru Dowlaha Maaliyadda Maxamuud Xayir, Wasiirka Warfaafinta iyo Hanuuninta dadweynaha Cabdiraxmaan Cumar Cusmaan (Yariisow), Wasiirka Shaqada iyo Shaqaalaha Saalax Axmed Jaamac iyo wasiiro kale.

 

Golaha Wasiirada ayaa kulan la qaatey qaar kamid ah madaxda shirkadaha Xalen ku shaqeysta waxaana ay ku waregeliyeen in laga doonayo in ay bixiyaan canshuurta dalka ama ha ahaato mid dadban ama mid toos ah.

Xarunta Xalane ayaa hadda u ah shirkadaha shisheeye “Tax havens”, kuwaas oo dalalkoodina canshuurta kala soo baxsadey Soomaaliyana aan siin, maadaama ay degan yihiin xarunta Xalane ee la is weydiinayo in ay Soomaaliya ku taal iyo in kale.

Wasiirka Shaqada & Shaqaalaha Soomaaliya ayaa u sheegay madaxda shirkadaha Xalane ka hawlgala in aysan ka sii shaqeyn doonin dalka haddii aysan u hoggaansamin shuruucda.

Cabdiraxmaan Cumar Yariisow ayaa saxaafadda u xaqiijiyey in shirkadahaas laga doonaayo in ay bixiyaan canshuurta sida uu ahaa ballan qaadka Xukuumadda Kheyre iyo Madaxweyne Maxamed Cabdullaahi.