Jigjiga (estvlive) 29/07/2017

Waxaa so rasmi ah ooga furmay xarunta deegaanka ee magaalada jigjiga koobkii tartanka ciyaaraha kubada cagta ee gobolada iyo maamul magaalooyinka deegaanka, Iyadoo mudadii udanbaysay ay gobolada deegaanku sameeyeen tartan ciyaareed ka koobnaa dhamaan degmooyinka uu gobol walba ka kooban yahay si ay ooga xushaan ciyaartooydii ooga qaybgali lahayd tartanka ciyaaraha kubada cagta ee heer deegaan.

 

Hadaba furitaanka tartanka ciyaaraha kubada cagta ee gobolada iyo maamul magaalooyinka deegaanka ayaa waxaa kasoo qaybgalay mas’uuliyiin sare oo heer deegaan ah oo ay ugu horeeyaan mas’uuliyiinta xafiiska maamulka DDSI, Waxaana furitaankii tartankan kubada cagta ee gobolada deegaanka ugu horayn ka hadlay Wasiirka xafiiska maamulka DDSI mudane Cabdimahad Maxamed Cabaase oo sheegay inuu maanta si rasmi ah u furmay tartankii ciyaaraha kubada cagta ee gobolada deegaanka oo ah mid sanad walba la qabto xiligan oo kale islamarkaana kor loogu qaadayo xirfada ciyaareed ee dhalinta deegaanka si loo helo dhalin caafimaad qabta oo tayo leh islamarkaana ka qaybqaata tartamada ciyaareed ee heer iyo heer caalamba.

Wuxuuna wasiirku intaa ku daray in kooxaha goboladu si anshax leh oo quruxbadan u ciyaaraan mudada uu tartanku soco. Sikataba ha ahaatee tartankan ciyaaraha kubada cagta ee gobolada deegaanka ayaa waxaa lagu furay gobolada Daawa iyo Shiniile.