London (estvlive) 26/08/2017

Nin ku hubeysan mindi ayaa habeenkii xalay dhaawac gaarsiiyey ciidamo ka tirsan Booliska Ingriiska. Weerarka ayaa ka dhacay meel ku dhaw aqalka Bqorotooyada ee Buckingham Palace magaalada London, fiidnimadii Jimacada.

Ninkan ayaa la sheegayaa in uu watey gaari, waxaana istaajiyey Booliska, gaarigiisa ayey ku arkeen mindi aad u weyn waxaana ay isku dayeen in ay qabtaan, kadibna wuu la dagaalemay Booliska. Boolisku waxay ku guuleysteen in ay qabtaan ninka mindida watey.

 

Laba kamid ah ciidanka Booliska ayaa dhaawac fudud ka soo gaarey gacmaha. Ninka weerarka geystey ayaa ahaa 26 sano jir, lama sheegin jinsiyadiisa, waxaana hadda waraysanaya Booliska oo sheegay in ay ku tuhmayaan arrimo argagixsnimo.

Weerar kan lamid ah ayaa ka dhacay magaalada Brussels ee dalka Biljimka, waxaana aad isugu dhawaa xiliyada, ninkii geystey weerarka Brussels ayaa boolisku toogtey waxaana uu ku geeriyoodey Isbitaalka, qaar kamid ah warbaahinta ayaa sheegaya in uu asaal ahaan ka soo jeedo Soomaaliya.