Boosaaso (estvlive) 26/08/2017

Dekadda magaalada Bosaso   ayaa waxaa  ku soo xirtay markab  rashiin gar-gaar u waday dadkii ay abaaruhu saameeyeen ee ku sugan gobolada dalka. Deeqda raashinka ah ayaa ka timid dalka Turkiga.

Gar-gaarka markabku sido ayaa  ku wajahan yahay deegaanada ay ka arrimiyaan dowlad goboleedyada Puntland, Galmudug iyo Hirshabeelle waxaana markabkan uu ka soo shareecday markiisa hore  dekedda magaalada Muqdisho ee caasimadda Soomaaliya.

 

Wasiiro ka tirsan dowlad goboleedka Galmudug isla markaasina xubin ka ah guddiga gurmadka abaaraha heer  qaran  ayaa la socday markabka, iyagoo u kuurgalayey markabka rashiinka gar-gaar ahaa wadey in six ah u tagey iyo habka loo qeybinayo.

Wasiir ku xigeenka wasaaradda dekadaha, gaadiidka badda iyo la dagaalanka burcad badeedda Puntland Cabdirisaaq Nuur Cumar ayaa sheegay in markabka uu sido 4000 oo tan oo raashiin ah oo loogu tala galay in loogu gurmado dadkii ay abaarta saameysay

Axmed Dhiblaawe Caseer oo ka mid  ah guddiga gurmadka abaaraha heer qaran  ayaa umahadceliyey Puntland sid ay u soo dhaweeyeen,  asigoona intaasi ku daray in gar-gaarka ay soo dhiibtay dowladaha  Turkiga iyo Indunisiya.

Rashiinka ayaa ka kooban bur iyo sonkor mana ahan markii ugu horeysay ee dekadda Bosaso uu ku soo xirto markab sida gar-gaar bini’aadanimo.

Deegaano kamid ah gobolka Koonfurta Mudug iyo Galguduud waxaa weli ka taagan abaar aad u daran.