Jarmalka (NogobNews) 10/10/2016

Booliska dalka Jarmalka ayaa gacanta ku dhigey nin u dhashey dalka Siiriya oo lagu tuhunsanaa in uu qorsheynaayey weerar Bom ah in uu ka fuliyo gudaha Jarmalka.

22 sano jir u dhashey dalka Siiriya oo qaxooti ku ahaa Jarmalka, magiciisana lagu sheegay Jabar Albakr ayaa ka baxsadey booliska magaalada Chemitz. Booliska ayaa guriga ninkaani deganaa ka heley aaladaha qarxa oo garaya boqolaal garaam.

– Aalada qaraxda ee la helay ayaa ah mid ka khatar badan tan TNT, wax aad u yar xitaa waxa uu sameyn karaa dhaawacyo aad u culus, sidaas waxaa sheegay Tom Bernghat oo u hadley Booliska.

Jabar Albakar ayaa la baadigoobayey muddo laba maalmod ah, waxaana lagu qabtey habeenimadii xalay ee Isniinta magaalada Leipzig oo ku taala Koonfurta Jarmalka, una jirta 85km magaaladii uu ka baxsadey. Booliska ayaa barta Twitterka ku sheegay in ay qabteen ninkii sida weyn loo baadigoobaayey

 

Booliska ayaa ka helay taageero qaar kale oo kamid ah dadka u dhashey Siiriya oo doonaayey in ninkaan la qabto, kuwaas oo gudbiyey halka uu ku dhuumanaayey. Ninka la qabtey ayaa Jarmalka yimid sanadkii hore 2015, waxaana uu dalabadey Magangelyo.

Sida uu qoray Wargeyska Süddeutsche Zeitung ee ka soo abxa dalka Jarmalka, waxa ninkaani xiriir la lalahaa ururka Daacish, waxaana uu xiriir kula sameeyey kooxdaas dhanka Internetka.