Gaalkacyo (NN) 11/11/2016

Madaxweynaha Puntland Cabdiweli Maxamed Cali Gaas iyo wafdi uu hogaaminayo ayaa maanta oo Jimce ah gaaray magaalada Gaalkacyo ee xarunta gobalka Mudug.

Madaxweyne Gaas oo hadal kooban siiyey Saxaafada ayaa sheegay arrimaha ugu muhiimsan oo ay u yimaadeen Gaalkacyo ay tahay xalinta xiisada ka taagneyd koonfurta iyo Galbeedka Gaalkacyo oo ay todobaadyadii lasoo dhaafay ku dagaalameen ciidamada Puntland iyo kuwa Galmudug.

Prof.Gaas ayaa sheegay inay filayaa in sidoo kale ay magaalada Gaalkacyo dhawaan ay soo gaaraan mas´uuliyiinta kala duwan oo ka qeyb qaadaneysa xasilinta magaalada Gaalkacyo, kuwaasi oo ka imaan doona maamulada dalka ka jira.

Wuxuu sidoo kale Madaxweynaha Puntland ka hadlay arrimaha Abaaraha ka jira Soomaaliya gaar ahaan deegaanada ka tirsan Puntland oo uu sheegay in abaar ba’an oo saamayn weyn ku reebtay  dadka iyo duunadda ay  ka jirto.

” Colaadda iyo abaartuna waa laba waxyaalood oo alle laga magan galo, ilaahay waxaan ka rajeynaynaa inuu umaddiisa qaboojiyo oo naxariistiisa siiyo , runtii dadku aad bay u dhiban yihiin xooluhuna aad bay u tabar daran yihiin, ilaahay ayaa awoodi kara inuu abaarta inaga dul qaado, waana muhiim inaan ilaahay barino oo ducaysano” ayuu yiri Madaxweynaha Dawladda Puntland.

Madaxweynaha Puntland waxaa la filayaa inuu maalmaha soo socda uu ku sugnaan doona agaalada Galkacayo, waxaana  la sugayo Madaxda Sare ee Dawladda Federaalka Soomaaliya iyo Madaxweynah Galmudug iyo qaar ka mid ah  maamulada Dalka ka dhisan  si loo soo afjaro dagaalada iyo Colaada ka jirta  Gaalkacayo.