Garoowe (estvlive) 13/06/2017

Shir Jaraa’id oo maanta ay ku qabteen xarunta Guddiga doorashada ee magaaladda Garoowe waxay faahfaahin kaga bixiyeen qodobadkii ka soo baxay shirkii wada-tashiga nidaamka axsaabta badan ee Puntand oo maalintii axadii 11 june lagu qabtay xarunta PDRC ee Garoowe.

Guddigu waxay sheegeen in  dood iyo wada-tashi dheer ka dib ay  guddigu isku raaceen  lix qodobo oo ka mid ah talooyinkii ay soo jeediyeen Siyaasiyiinta, Aqooyahanadii, ururadda bulshadda iyo gollaha xukuumadda ee ka qaybgalay shirkii PDRC , qodobadaasi waxay kala  ahaayeen.

1. In la yareeyo khidmadaha diiwaan gelinta ururada iyo Axsaabta siyaasiga ah.
2. In la yareeyo tirada taageerayaasha ururada ku yeelanaayaan goboladda Puntland ( Tiradii hore 300 qof gobol kasta).
3. In la sameeyo Maxkamadii dastuuriga ahayd sida ugu dhaqso badan.
4. In la kordhiyo muddada diiwaan gelinta ee ku ekayd 25 June 2017.
5. In la socod siiyo hanaanka geedi socodka xisbiyada badan ee Puntland, iyada oo aan lagu xirayn xili doorasheedka 2019ka.
6. in dowladda Puntland shir u qabato beesha caalamka kuwooda danaynaya barnaamijka doorashooyinka Puntland.

Guddoomiye K/xigeenka Guddiga Doorashadda Maxamed Soofe Xasan wuxuu sheegay in guddigu ay barlamaanka u gudbin doonaan qodobada la xiriira lacagta laga qaadayo ururada iyo yaraynta tiradda taageerayaasha ururada ee goboladda, taasi oo ay sheegeen in barlamaanka oo kaliya uu go’aan ka gaari doono.

“Kordhinta mudda diiwaangalinta ururada waa shaqo u taal guddiga doorashadda, marka aan dib isugu laabano oo aan ka tashano ayaan soo bandhigi doonaa waqtiga lagu kordhinayo. mudadii hore waxay ku egtahay 25 bishan June 2017” ayuu yiri Guddoomiye Soofe.

Guddoomiyuhu wuxuu ugu baaqay siyaasiyiinta danaynaya inay hoggaamiyaan shacabka Puntland inay furtaan xisbiyo siyaasadeed, isagoo xusay inaysan isku xirnaan doonin doorashadda 2019ka ee Puntland  iyo  hanaanka axsaabta badan ee puntland.

Gabagabadii, Maalintii axadii ee toddobaadkan, Madaxweynaha Puntland Cabdiweli Gaas ayaa ka qaybgalay shirkii wadatashiga Nidaamka axsaabta badan kaasi oo ay isugu yimaadeen Xukuumadda, guddiga doorashadda, ururadda bulshadda Rayidka, Aqoonyahano iyo siyaasiyiin caan ka ah Puntland.