Senegal (estvlive) 16/07/2017

Ciyaartii kama danbeysta (Final) ee u dhaxaysey naadiyada Stade de Mbour iyo Union Sportive Ouakam ayaa ku dhamaatey murugo iyo geeri naxdin leh. Waxaa soo dumey qayb ka mid ah Garoonkii lagu ciyaaraayey, ugu yaraan sideed qof ayaa ku geeriyootay sida ay ku soo warantey wakaaladda wararka ee AFP.

 

Markii la gaarey dhamaadka ciyaarta ayaa waxaa isku baxsadey oo rabshado dhex mareen dadkii daawanaayey ciyaarta ee kala taageersanaa labada kooxdood. Booliska ayaa isticmaaley gaaska indhaha ilamada ka keena si ay dadka u kala celiyaan, kadib waxaa soo dumey qayb dhan oo garoonka lagu ciyaaraayey ah, taas oo ku habsatey dadka qaar halka qaarkii fadhiyeyna dhaawacyo culus ka soo gaareen.

Sida laga soo xiganayo AFP dadka ku dhintey shilkan ayaa ah sideed qof waxaana ku dhaawacmey dad ku dhaw 60 qof oo la geeyey Isbitaalka Dhakar.